Projet „Community 2.0“: Fräiwëlleger gesicht!

Projet „Community 2.0“: Fräiwëlleger gesicht!

Am Kader vun engem Projet, deen ech den Ament fir Rosa Lëtzebuerg ausschaffen, sichen ech no Fräiwëlleger, déi a Form vun engem Interview matmaache wëllen.

Community 2.0: ëm wat geet et?

Mam Akraafttriede vun der Gesetzesreform iwwert d’Bestietnes- an d’Adoptiounsrecht ass op ee Schlaag déi gréissten Ongläichbehandlung tëscht hetero- an homosexuelle Koppelen opgehuewe ginn. Selbstverständlech bleiwen am LGBTI+ Beräich nach vill Schanteger, ewéi zum Beispill d’Bluttspenden oder ganz generell de riisen Dossier mat de Belange vun Trans-Leit etc., bestoen.

Fir déi schwul-lesbesch Communautéit dierften elo awer rosa Zäiten bevirstoen. Dëst ass fir Rosa Lëtzebuerg e Grond, fir e Bléck nohannen, op d’Wuerzelen vun der Community zu Lëtzebuerg ze geheien, den aktuellen IST-Zoustand ze diskutéieren an no vir an d’Zukunft ze kucken. Virun dësem Hannergrond wäerte mir am Hierscht 2015 eng Table Ronde organiséieren, wou mer mat verschidde Leit iwwert d’Community zu Lëtzebuerg schwätze wëllen. D’Zil vun dëser Table Ronde soll et sinn, ze kucken, wat haut dës Dags de Besoin vun LGBTI-Leit zu Lëtzebuerg sinn.

Fir dës Table Ronde virzebereeden, brauche mer iech!
Ech sichen an deem Zesummenhang Fräiwëlleger, déi a folgend Profil passen:

  • Du bass schwul / lesbesch / bi / transident
  • du wars an der Vergaangenheet bannend der Community / Szene aktiv (z.b. bei Rosa Lëtzebuerg, Kollektiv Spackelter, Rosa-Lila etc.)
  • du hues d’lëtzebuergesch Szene besicht (Chez Mike, Pyramide, Monkeys etc.)
  • du hues eng Meenung (egal op positiv oder negativ) zu der Szene zu Lëtzebuerg & am Ausland

Wéi kann ech matmaachen?

Wéi uewen erkläert, geet et drëms, fir en Interview opzehuelen. Aus dësem Interview kënnen dann eenzel Aussoen an Témoignagen, während der Table Ronde ageblend ginn, fir esou d’Podiumsdiskussioun méi interaktiv ze gestalten an d’Iwwerleedungen vun deem engen op dat anert Thema ze erméiglechen.

Wanns de interesséiert bass, da giff ech mech freeën, wanns de dech ënnert andy.maar@rosa-letzebuerg.lu giffs mellen.